Ståle Dimmen & Blaa Mixture

Etter årevis i musikklivet, som trubadur og som bandmusikar, har Ståle Dimmen spinka og spart.  No har han satsa sparepengane på ei plateinnspeling litt utanom det vanlege. Sunnmørsk bluesmusikk på dialekt er ikkje kvardagskost.

Mitt i livet har han erfaring frå eit utal spelejobbar.  Der har han treft mykje kjekke, rare, snille folk, men også ufordragelig ærlege folk. Gjerne i seine nattetimar då han utsliten etter 20 timar på jobb med køyring rigging og lemping må samle alle krefter og bruke all si pedagogiske røynsle for å forklare at han klarar ikkje å synge Tore Tang fleire gongar.  Nei beklagar verkeleg.  Ikkje ein gong til. Umogeleg.  Han har erfart at livet på vegen er slitsamt når fjellovergangane er igjennsnøva, når siste ferja er midtfjords på veg heim om natta, og at fjordtarmane på det vakre Vestlandet ikkje er det minste innbydande i storm, regn og sludd på veg til eller frå ein einsleg trubadurjobb lengst vekke og innst inne i universets største gråstein.

Mitt i livet har han dyrekjøpt erfaring som småbonde på økologisk vertikalbruk I Hjartåbygda.  Det er hardt å brødfø sine eigne, fellesskapet og alle dei som bed sårt om almisse for sjuke og fattige i fjerne strok. Det dårlege samvitets kamp om midlane mot sårt tiltrengt livsnytelse.  Slik vert det blues av.  Og Ståle har grave etter røtene langt nede i grunnvollen. Og dei er blå, svarte og litt grå. Ståle Dimmen har dikta tekstar som kan beskrivast som kvardagspoesi.  Dei er omslutta av blues, country og rock med litt småfunky vendingar.

Dette er resultat av årelang forsakelse.  Han såg langt etter naboane som reiste til syden, kjøpte campingvogn, flotte Mercedesar,  Her er Ståle si hytte på fjellet.  Ei plate til nytelse, forlystelse og undring.  Aldeles fritt frå musikksnobberi. Ei nauta bra plate som kan brukast og nytast kvar som helst.  I syden eller I Mercedesen på campingtur