SYMRE

Eg heiter Symre Taugbøl Bang og har drive med musikk gjennom heile oppveksten. Hovudinstrumentet mitt er gitar, men song og hardingfele har alltid vore med på vegen. 

Å formidle tekst og musikk på ein god måte krev erfaring på same vis som sjølve spelinga. Som solo-trubadur har eg vore borti mykje forskjellig, til dømes taffelmusikk på sommarkafe og pub,  hardingfele i gravferd og på museum,  folkesong på politiske møte og grunnsteinnedleggelsar, og ønskelåtar i bryllaup og markeringar. Eg har spelt på fjellstøyler og låvebruer, i kyrkjer og maskinhallar, i private stover og på opne utescener. 

Eg set saman det musikalske programmet til kvart oppdrag, anten basert på repertoar eg har frå før eller kanskje eg lærer noko nytt for høve. Solo-oppsettet mitt er som oftast med kassegitar og song gjennom loop-pedal. Eg har ulike alternativ for oppsett både akustisk, i stort PA med lydteknikar og med å vere min eigen teknikar med enkelt forsterkaroppsett. 

Bacheloren min i utøvande musikk er delt inn i to år på jazzgitar på Griegakademiet i Bergen og to år på «det frie kandidatstudiet» på NMH i Oslo. 

Min eigen musikk får ofte tilbakemeldinga «finurleg», med norsk tekst som vinglar mellom humor og alvor. På musikklina i Skien starta for alvor interessa for tekstskriving, og eg avslutta VGS med å spele inn albumet "YMSE" med hjelp av ein klassekamerat. Hausten 2024 kom albumet «Elles ganske frisk», –ein fargerik bukett av tekst og musikk skrive i alderen 18 til 22. Eg likar tekstar med humor trass i alvorlege tema, som ein kan høyre i singelen «Det mange som hatar jol» frå 2023. Eg knyt mykje av identiteten til heimstaden min Morgedal, og har komponert og spelt inn jubileumslåta til Vest-Telemark Blad «Allting som har skjedd», og bygdelåta «Kom heim att», - som er bruka i dokumentarfilm om fråflytting frå Vest-Telemark.

Juni 2025 speler me inn nytt album med planlagt lansering vinteren 2026.